كتاب مملكتي! – محمد حسن شريم
كتاب مملكتي!
محمد حسن شريم
كلما فتحت كتاب مملكتي،
عاصفحة عيوني:
بقرا أناجيل العشب والمَيّ، بقشع شرايين الورد، دورة حياة الرّيح،
بسمع مواويل الهوا، طرطشة دمّ الفصول، حكي الشّمس همس الجّبال،
زقفة العتمِه بتوبها الأبيض!
رقصة بنات النّار،
وعفِّة بنات النور.
كلما فتحت كتاب مملكتي،
عاصفحة الإيام:
بْمدّ إيدي عَ الوقت بقطف عُمر، بحكي الشّهوِه بتحفظ دورس الجمر!
بنفخ بغصن الغيم روح المَيّ، بيدقّ قلب الأرض، يتنفّسو عروق الشّجر، يتقطّبو جروح العتم، وينشمّ ريحة ضوّ.
كلما فتحت كتاب مملكتي،
عاصفحة دموعي :
بشمّ ريحة نحر فايح دمّ، ودموع عينين الصّليب، ظلم وجريمِه شيطنِه وذنوب،
وحروب.
بقلب الصفحه
بسكّر كتابي :
بسمع ضجيج تراب، جوعان عاسفرة ذنوب،
وكفن عم يضحك بدون جياب، وقبر فاتح للضّيافِه باب،
يا غبن عُمرَك شو قصير، بالدّني يا إنسان،
إلبس تياب الدّمع والتوبِه، من قبل بعثرة القبور،
وللموت غُصنَك من قبل مَ يميل،
حضّر لِ يوم حسابَك رجوعَك،
يوم الحشر عمرو طويل،
قصّر الضُحكِه…
وطوّل دموعَك…
