بعلبك – مارون أبو شقرا

مارون أبو شقرا

بعلبك

واعي عَمْ يدَبْدِب تَحت كَعْبا القَمَر…

بِتْنِزّ شَمْس صْخور هَالقَلْعَه!!!

بِتعَلّمَك كيف الأُلوهَه بْتِنْدَقَر!!!

آيِه.. وإذا بيهرّ عن رمْشا حجر،

شوف السّما اْنْ كَنّو اْنْكَسَر ضلْعا!!!

صور ليش المَوْج مَسَّحْلِك دموع؟؟؟

والليل ضَوَّالِك أَصابيعو شموع؟؟؟

إنتي البُطولِه تْخَيَّطِت عَ سْواحلِك…

وِالحوت شو ما شَدّ منخارو طلوع،

راس البحر بَاقي لَتَحت كْواحلِك…

زهراء بطَلِه جنوبيِّه، تبرّعت بعينا لخطيبا اللي فقد بَصَرو بجريمة 17 أيلول 2024

زهراء عم تحكي

زندَك صخر… صابيعَك جْنَيْنِه!!!

صَوتَك غَطايي… السّقف… والشّبّاك…

مِتْلِ مَ قْسَمنا الفَرَح أنا وايّاك،

بُقْسُم الشَّوفِه بينَك وبيني،

تَ تشوفني كِف بقشعَك، مَحْلاك…

وبطِّل لَخَوفي عْلَيْك إتْرَجّاك…

… رَحْ تِنْتِبِهلي كتير عا عيني…